OV in der Skihütte Mörlialp

Da mier gärä Skihüttene hend, simmer das Jahr für üsi OV is Mörli uifegreifled. Aber zersch heds vom Turnverein Bliämlipower no chli Morge-Gymnastik gäh und aaschliessend en chliini Schnitzeljagd rund ume Sarnersee. Wo de so langsam Auto um Auto vor dr Hüttä iitrudlet isch heds natürli zersch äs Bierli gäh, glii druifabe nu s'Zmittag und de wieder es Spieli. Im Verlauf vom Namitag hemmer üsne vollzählig erschienene Nywmälche üses Vereinsläbe erklärt und sie mit ihrne Rächte und Pflichte vertraut gmacht. Nachdem de oi d'MuKo no zämägsässä isch hemmer de mit dr ordentliche OV chennä startä, hend de diverses wo adr GV kei Platz meh gha hed besproche und de oi nu d'Mottowahle abghalte (nei, mier verratid niid!).

Wo denn also die ganze administrative Aaglägeheite dure gsii sind heds de nu wieder Spieli gäh und will ich chli meineid Hunger gha han (und de paar ander gloib oi nu) isch de s'Znacht chli vorverleit worde. Meineid feini Älplermagrone heds gäh; zum Glück hends de gnueg gmacht so dases oi nu füre Mitternachts-Snack glänged hed. Ja nach dene Darbietige und sportlich aaspruchsvolle Spieli hedmä chli meh Kalorie vrbrätled als susch. Für alli gwundrige heds oi nu paar Fetäli gäh, falls ier wennd luege wie's zue und här gange isch ;)